काठमाडौँ, २६ साउन । प्रधानमन्त्री शेरबहादुर देउवाले शान्ति, प्रजातन्त्र, विकास र असल छिमेकीपनमा आतंकवाद सबैभन्दा ठूलो चुनौती बनेको बताएका छन् ।
बहुक्षेत्रीय प्राविधिक तथा आर्थिक सहयोगका लागि बंगालको खाडीको प्रयास (बिमस्टेक) को १५औँ मन्त्रीस्तरीय बैठकको उद्घाटन गर्दै देउवाले आतंकवादका सबै रुपका प्रकटीकरणलाई नेपालले निन्दा गर्ने बताए ।
प्रधानमन्त्री देउवाले समानता र सहकार्यको मर्मलाई आत्मसात् गर्दै सदस्य मुलुकको आर्थिक वृद्धि र सामाजिक समृद्धि संयुक्त रुपमा हासिल गर्ने उद्देश्यले स्थापना भएको बिमस्टेकका आदर्श र उद्देश्यप्रति नेपाल पूर्ण प्रतिबद्ध रहेको बताउँदै , “बिमस्टेक मुलुकका जनतासँग हामी वाचा गरौँ कि क्षेत्रीय सहयोगको ढाँचा र यसका प्रमुख विषयमा समझदारी कायम गर्दै व्यापार, लगानी, सम्पर्क विस्तार जस्ता सबै क्षेत्रमा निर्णयमा पुगौँ र ऊर्जा, प्रविधि स्रोत र जलवायु परिवर्तनसम्बन्धी बाँकी रहेका कार्यलाई पूर्णरुपमा कार्यान्वयनमा लैजानु पर्नेमा जोड दिए ।”
बिमस्टेक स्थापनाको २० औँ वार्षिकोत्सवका सन्दर्भमा यो अवसरलाई परिवर्तनको विन्दुका रुपमा लिँदै बिमस्टेकको इतिहासलाई गतिशील तुल्याउन जरुरी भएको विचार व्यक्त गर्दै प्रधानमन्त्री देउवाले साझा प्रतिबद्धता र सहकार्यका निम्ति अग्रसर हुनुको विकल्प नरहेको बताए ।
आर्थिक वृद्धि र समृद्धिको मार्गमा गरिबी भीषण चुनौतीका रुपमा रहेको बताउँदै उनले बिमस्टेक क्षेत्रका जनताको सम्मानपूर्वक बाँच्न पाउने अधिकारका लागि सबैले सामूहिक एवं निर्णायक रुपमा काम गर्नुपर्ने औँल्याए ।
जलवायु परिवर्तन र प्राकृतिक विपत्तिले हाम्रो अस्तित्वमा गम्भीर खतरा सिर्जना गरेको बताउँदै प्रधानमन्त्री देउवाले दैवीविपत्तिको जोखिममा नेपाल रहेको पुष्टि सन् २०१५ को भूकम्पले गरेको छ भन्दै जलवायु परिवर्तनका कठोर परिणामले पनि नेपाललाई गाँजेको बताए । उनले यी सबै किसिमका चुनौतीको सामना गर्न सदस्य मुलुकबीच सुदृढ एवं सबल सहकार्य अपरिहार्य भएको बताए ।
