काठमाडाैं। सत्तारुढ नेकपा (माओवादी केन्द्र) को पदाधिकारी बैठकमा राष्ट्रपति निर्वाचन सम्बन्धमा छलफल हुँदैछ ।
अपराह्न ४ः३० मा बस्ने पदाधिकारी बैठकमा राष्ट्रपति निर्वाचन सम्बन्धमा अहिलेसम्म अरू दलहरूसँग भएको छलफलका बारेमा पनि कुराकानी हुने माओवादी केन्द्रीय कार्यालय सचिव डोरप्रसाद उपाध्यायले आज बताउनुभयो ।
माओवादी केन्द्रले राष्ट्रपति निर्वाचनमा राष्ट्रिय सहमतिमा जोड दिँदै आएको जिज्ञासामा उहाँले भन्नुभयो, “राष्ट्रिय सहमति नै एक प्रकारको बटम लाइन जस्तै हो, विभिन्न कारणले । राष्ट्रिय सहमति हुने पात्र एमालेबाट पनि हुन सक्ने भयो, नेपाली काङ्ग्रेसबाट पनि ल्याउन सक्ने भयो, सर्वमान्य हुनुपर्यो ।”
निर्वाचन आयोगले राष्ट्रपति निर्वाचनको मिति यही फागुन २५ गते तय गरिसकेको छ ।
