काठमाडाैं । चर्चित नेपाली रकगायक तथा अभिनेता रविन तामाङको निधन भएको छ ।
मंगलबार साँझ काठमाडाैंकाे बूढानीलकण्ठस्थित आफ्नै निवासमा मृत भेटिएका रकस्टार रविन तामाङकाे हृदयाघातका कारण निधन भएकाे हुन सक्ने प्रारम्भिक अनुमान प्रहरीले गरेकाे छ । प्रहरी प्रभाग बूढानीलकण्ठका इन्स्पेक्टर दीपेन्द्र चन्दका अनुसार कोठाको ढोका लक भएको अवस्थामा तामाङ मृत भेटिएका थिए ।
दिउँसाेदेखि घरमा एक्लै रहेका तामाङकाे फाेन नउठेपछि काम विशेषले घरबाहिर रहेकी श्रीमतीले उनकी दिदी भगवती तामाङलाई खबर गरेकी थिइन् । त्यसपछि आफूले पनि फाेन गर्दा नउठेपछि दिदी भगवतीले भाइ रविनकाे घरमै पुगेर प्रहरीलाई खबर गरेकी थिइन् ।
प्रहरीका अनुसार घटनास्थलमा शङ्कास्पद केही भेटिएकाे छैन । अहिले तामाङकाे शव परीक्षणका लागि त्रिवि शिक्षण अस्पताल महाराजगञ्जमा राखिएको छ ।
