दिलिप पराजुली
दोहा,
सेवा नै धर्म हो, सम्पूर्ण जिल्लाबासीहरू एक हौं भन्ने नारा लिएर सन २००४ मा स्थापना भएको संस्था ताप्लेजुङ पाथिभरा सेवा समाजले आफ्नो आठौं अधिवेशन सम्पन्न गरेको छ । अधिवेशनले कुमार खड्कालाई अध्यक्ष चयन गर्यो । अधिबेशनले बरिष्ठ उपाध्यक्षमा गोपाल खतिवडा, उपाध्यक्ष दुर्गा गुरुङ, महिला उपाध्यक्ष शिला गुरुङ महासचिव सागर तुम्बाहाम्फे, सचिब बिवश लिम्बू, केदार पौडेल, कोषाध्यक्ष प्रकाश गुरुङ र सह कोषाध्यक्षमा चन्द्र पताङ्ग लिम्बू लाई चयन गरेको छ । त्यसैगरी सदस्यहरूमा दिपक प्रसाईँ, प्रकाश भण्डारी, पासाङ गुरुङ, सि पि गुरुङ, टिकाराम गुरुङ , गणेश खड्का, खगेन्द्र सेन्देङ, योग्य कार्की निर्विरोध चयन भएका छन् ।
संस्थाका अध्यक्ष दुर्गा प्याकुरेलको सभातित्वमा सम्पन्न कार्यक्रममा गैह्रआवासीय नेपाली संघ कतारका अध्यक्ष रमेश भट्टको प्रमुख आतिथ्यतामा सम्पन्न भएको थियो । कार्यक्रममा विभिन्न बैचारिक संस्था, प्रदेश संस्था, जिल्ला संस्था एवं जातीय संघ संस्थाका प्रमुख तथा सामाजिक अभियान्ताहरूको उपस्थिति रहेको थियो ।
प्रमुख अतिथी भट्टले शुभकामना दिँदै पाथीभरा त्यसै पनि प्राचीन कालदेखि नै धार्मिक सहिष्णुता बोकेको जिल्ला भएकाले ताप्लेजुङ सबैमा चिरपरिचित भएको बताए । कार्यक्रमका सभापतिले उपस्थित सम्पूर्णलाई हार्दिक धन्यवाद दिँदै कोशी प्रदेश भित्रका जिल्ला संस्थाहरूलाई सहकार्य र समन्वयका लागि आग्रह गरेका थिए ।
कलाकार मौसमी गुरुङ, सोनि आले मगर, सोनिया गुरुङ, राजेन्द्र सामेखाम, चन्द्र गुरुङ, बिरेन मादेन लगायतले स्वागत नृत्यसँगै च्याब्रुङ नृत्य प्रस्तुत गरेका थिए । त्यस्तै शुष्मा भूजेलले डालीडाली फूल फुल्यो भन्ने गितको बोलमा आफ्नो धमकेदार नृत्य गरेकी थिइन । सिताराम कटवाल, सरला तामाङले गित गाएर मनोरञ्जन दिएका थिए । ब्यानर अनावरण, दिप प्रज्वलन, राष्ट्रियगानबाट शुरु गरेको कार्यक्रममा संस्थाका उपाध्यक्ष गोपाल खतिवडाले सहभागीलाई स्वागत गरेका थिए ।